സോളാര്‍ aകേസിലെ അന്വേഷണത്തിന്റെ ഭാഗമായി പോലീസ് ശേഖരിച്ച ഫോണ്‍വിളിയുടെ രേഖകള്‍ ചോര്‍ന്നതിനെ കുറിച്ച് പാര്‍ട്ടി അന്വേഷണം നടത്തുമെന്ന് കെ.പി.സി.സി. പ്രസിഡന്റ് രമേശ് ചെന്നിത്തല പറഞ്ഞു. മന്ത്രിമാര്‍ അടക്കമുള്ളവരെ സരിത എസ്. നായര്‍ വിളിച്ചതിന്റെ രേഖകള്‍ ചോര്‍ന്നത് ആഭ്യന്തരമന്ത്രിയുടെ അറിവോടെയാണെന്ന് വിശ്വസിക്കുന്നില്ലെന്നും പാര്‍ട്ടിയില്‍ നിന്ന് സര്‍ക്കാരിനെതിരെ നീക്കങ്ങളൊന്നും നടക്കുന്നില്ലെന്നും ചെന്നിത്തല പറഞ്ഞു. സോളാര്‍ തട്ടിപ്പു കേസില്‍ മുഖ്യമന്ത്രിക്ക് പാര്‍ട്ടിയുടെ പൂര്‍ണ പിന്തുണയുണ്ടെന്നും അദ്ദേഹം പറഞ്ഞു.