(ജോര്‍ജ് തുമ്പയില്‍)
കൊറോണ വൈറസിനെതിരായ സംസ്ഥാനത്തിന്റെ യുദ്ധം ശക്തിപ്പെടുത്താന്‍ ഗാര്‍ഡന്‍ സ്‌റ്റേറ്റ് വിദേശ ഡോക്ടര്‍മാരെ വിളിക്കുന്നു.
വിദേശ ലൈസന്‍സുള്ള ഡോക്ടര്‍മാര്‍ക്ക് താല്‍ക്കാലിക അടിയന്തര ലൈസന്‍സുകള്‍ നല്‍കാന്‍ സംസ്ഥാനം ശ്രമിക്കുമെന്ന് ഗവര്‍ണര്‍ ഫില്‍ മര്‍ഫി അറിയിച്ചു. ഈ നടപടി സ്വീകരിക്കുന്ന ആദ്യത്തെ സംസ്ഥാനമാണ് ന്യൂജേഴ്‌സി എന്നും അദ്ദേഹം പറഞ്ഞു. ഗാര്‍ഡന്‍ സ്‌റ്റേറ്റിന്റെ ആഴത്തിലുള്ള കുടിയേറ്റ ചരിത്രം കണക്കിലെടുക്കുമ്പോള്‍, കോവിഡ് 19 പ്രതിസന്ധിയില്‍ സഹായിക്കാന്‍ ആദ്യമായി വിദേശ ഡോക്ടര്‍മാര്‍ക്ക് ലൈസന്‍സ് നല്‍കുന്നത് ന്യൂജേഴ്‌സിയാണെന്ന് മര്‍ഫി പറഞ്ഞു. 'ലോകമെമ്പാടുമുള്ള ആളുകള്‍ ഒരു പുതിയ ജീവിതം കെട്ടിപ്പടുക്കുന്നതിനും അമേരിക്കന്‍ ജീവിതം സ്വപ്‌നം കാണുന്നവരാണ്. അവര്‍ക്കായി വാതില്‍ തുറന്നിട്ടൊരു സംസ്ഥാനമാണിത്.' ഗവര്‍ണര്‍ മര്‍ഫി പറഞ്ഞു.
ന്യൂജേഴ്‌സിയിലെ ഒരു കൊച്ചു പട്ടണമായ വെസ്റ്റ് ന്യൂയോര്‍ക്കിലെ മുന്‍ മേയറായിരുന്ന ഫെലിക്‌സ് റോക്ക് ഗവര്‍ണര്‍ മര്‍ഫിയോട് വിദേശ ഡോക്ടര്‍മാര്‍ക്ക് ലൈസന്‍സ് നല്‍കണമെന്ന് ആവശ്യപ്പെട്ടിരുന്നു. ഗവര്‍ണറുടെ പ്രഖ്യാപനം കേട്ടതില്‍ സന്തോഷമുണ്ടെന്ന് റോക്ക് പറഞ്ഞു. സംസ്ഥാനത്തിന്റെ കോവിഡ് 19 പ്രതിരോധത്തിനായി മുന്നൂറിലധികം ഡോക്ടര്‍മാര്‍ സന്നദ്ധസേവനം ചെയ്യാന്‍ വ്യക്തിപരമായി സഹായിച്ചിട്ടുണ്ടെന്നും റോക്ക് കൂട്ടിച്ചേര്‍ത്തു.
താല്‍ക്കാലിക ലൈസന്‍സിന് അപേക്ഷിക്കുന്ന വിദേശ ഡോക്ടര്‍മാര്‍ നിലവില്‍ ലൈസന്‍സുള്ളവരും മറ്റൊരു രാജ്യത്ത് മെഡിസിന്‍ പ്രാക്ടീസ് ചെയ്യുന്നതില്‍ നല്ല നിലയിലുമായിരിക്കണം. അവര്‍ കുറഞ്ഞത് അഞ്ച് വര്‍ഷമെങ്കിലും മെഡിസിന്‍ പ്രാക്ടീസ് ചെയ്തിരിക്കണം. അച്ചടക്കരാഹിത്യമോ ക്രിമിനല്‍ ചരിത്രങ്ങളോ ഇല്ലെന്നു ഉറപ്പുവരുത്തണം. കൂടാതെ അവരുടെ മെഡിക്കല്‍ ലൈസന്‍സ് പോലെ അപേക്ഷയെ പിന്തുണയ്ക്കുന്നതിന് പ്രസക്തമായ രേഖകളുടെ പകര്‍പ്പുകള്‍ നല്‍കണം. ഒരു വിദേശ ഡോക്ടര്‍ക്ക് താല്‍ക്കാലിക ലൈസന്‍സ് ലഭിച്ചുകഴിഞ്ഞാല്‍, ന്യൂജേഴ്‌സി ആരോഗ്യവകുപ്പ് ലൈസന്‍സുള്ള ഒരു നിര്‍ദ്ദിഷ്ട അടിയന്തര ആരോഗ്യ കേന്ദ്രത്തില്‍ മാത്രമേ വ്യക്തിഗത പരിചരണം നല്‍കാന്‍ അനുവദിക്കൂ.
സംസ്ഥാനത്തിന് പ്രത്യേകിച്ച് ഡോക്ടര്‍മാര്‍, ഫിസിഷ്യന്‍മാര്‍, നഴ്‌സുമാര്‍, റെസ്പിറ്റോറി തെറാപിസ്റ്റുകള്‍, അടിയന്തിര മെഡിക്കല്‍ ടെക്‌നീഷ്യന്‍മാര്‍ എന്നിവരെ ആവശ്യമാണ്. 22,000 മെഡിക്കല്‍ പ്രൊഫഷണലുകള്‍ ഇതുവരെ സന്നദ്ധസേവനം നടത്തിയിട്ടുണ്ടെന്ന് മര്‍ഫി പറഞ്ഞു. സന്നദ്ധപ്രവര്‍ത്തനം നടത്താന്‍ ആഗ്രഹിക്കുന്ന ഏതൊരു മെഡിക്കല്‍ പ്രൊഫഷണലിനും ഇപ്പോള്‍ അതിനുള്ള സൗകര്യമുണ്ട്.
മെഡിക്കല്‍ പ്രൊഫഷണലുകളല്ലാത്ത സന്നദ്ധപ്രവര്‍ത്തകരെയും സംസ്ഥാനത്തിന് ആവശ്യമുണ്ട്, പ്രായമായവര്‍ക്ക് ഭക്ഷണം എത്തിക്കുക, ഭക്ഷണമുണ്ടാക്കാന്‍ സഹായിക്കുക തുടങ്ങിയ മറ്റ് മാര്‍ഗങ്ങളില്‍ അവരുടെ കമ്മ്യൂണിറ്റികളെ സഹായിക്കാന്‍ ഗവര്‍ണര്‍ മര്‍ഫി പറഞ്ഞു.
Comments