ന്യൂയോർക്ക്∙ അൻപത് വർഷം മുൻപ് ചന്ദ്രനിൽ നിന്നും കൊണ്ടുവന്ന പാറ കഷ്ണങ്ങൾ ന്യുയോർക്കിൽ നടന്ന ലേലത്തിൽ 855,000 ഡോളറിന് പേര് വെളിപ്പെടുത്തുവാൻ ആഗ്രഹിക്കാത്ത അമേരിക്കക്കാരൻ സ്വന്തമാക്കി.

1970 ലെ സോവിയറ്റ് ലൂന –16 മിഷനാണ് ചന്ദ്രനിൽ നിന്നും പാറ കഷ്ണങ്ങൾ ഭൂമിയിലെത്തിച്ചത്. 1950–60 കാലഘട്ടത്തിൽ സോവിയറ്റ് സ്പെയ്സ് പ്രോഗ്രാം മുൻ ഡയറക്ടർ സർജി കൊറൊലോവിന്റെ വിധവയുടെ കൈവശമായിരുന്നു ലേലം ചെയ്ത പാറ കഷ്ണങ്ങൾ. ഭർത്താവിന്റെ സ്മരണയ്ക്കായി സോവിയറ്റ് യൂണിയൻ ഭരണാധികാരികളാണ് ഇത് ഇവരെ ഏൽപിച്ചത്.

1970 സെപ്റ്റംബറിലാണ് ലൂനാ –16 ചന്ദ്രനിലിറങ്ങിയത്. 25 സെന്റീ മീറ്റർ ആഴത്തിൽ ചുരന്നാണ് പാറ കഷ്ണങ്ങൾ ശേഖരിച്ചത്.