ജയിസണ്‍ മാത്യു

ടൊറോന്റോ : മികച്ച വാഗ്മിയും സംഘാടകനും എഴുത്തുകാരനും കനേഡിയന്‍ മലയാളി അസോസിയേഷന്‍ പ്രസിഡന്റുമായിരുന്ന ബോബി സേവ്യറിന്റെ ശവസംസ്‌കാര ശുശ്രൂഷകള്‍ ശനിയാഴ്ച പകല്‍ 11 മണിക്ക് മിസ്സിസ്സാഗായിലുള്ള സെന്റ് ഫ്രാന്‍സീസ് സേവ്യര്‍ കാത്തോലിക് പള്ളിയില്‍ ( (St.Francis Xaviour Church ( Mavis Road, Mississauga, ON L5V 2X5) (Mavis & Matheson) നടക്കും. തുടര്‍ന്ന് ബ്രാംടണിലുള്ള അസംഷന്‍ കാത്തോലിക് സെമിത്തേരിയില്‍ (Assumption Catholic Cemetry - 6933 Tomken Road Mississauga, ON L5T 1N4) മൃതദേഹം സംസ്‌കരിക്കും.

വ്യാഴാഴ്ചയും വെള്ളിയാഴ്ചയും വൈകുന്നേരം 5 മുതല്‍ 9 വരെ മേഡോവെയില്‍ വിസിറ്റെഷന്‍ സെന്ററില്‍ (Meadowale Visitation Centre (7732 Mavis Rd, Brampton, ON L6Y 5M1) മൃതശരീരം പൊതുദര്‍ശനത്തിന് വെക്കുന്നതാണ് . കഴിഞ്ഞ വെള്ളിയാഴ്ച രാവിലെ ഹൃദയസ്തംഭനത്തെതുടര്‍ന്നാണ് ബോബി സേവ്യറിന്റെ ദാരുണമായ മരണം സംഭവിച്ചത് . കേരളത്തില്‍ കോട്ടയം കുറവിലങ്ങാട് നന്പൂരിതൊട്ടിയില്‍ കുര്യന്റെയും അന്നമ്മയുടേയും പുത്രനാണ് . കുഞ്ഞുമോന്‍ , വല്‍സ ( രണ്ടുപേരും കാനഡയില്‍ ), ലൈലമ്മ എന്നിവരാണ് സഹോദരങ്ങള്‍. തലയോലപറന്പ് മരങ്ങോലില്‍ സോഫി തോമസാണ് ഭാര്യ. മാസങ്ങള്‍ക്ക് മുന്പ് നടന്ന തെരഞ്ഞെടുപ്പില്‍ സ്‌കൂള്‍ ബോര്‍ഡ് ട്രസ്ടിയായി തെരഞ്ഞെടുക്കപ്പെട്ട ഷോണ്‍ സേവ്യറാണ് ഏക പുത്രന്‍ . സ്‌കൂള്‍ ബോര്‍ഡ് ട്രസ്ടി തോമസ് കെ തോമസിന്റെ സഹോദരീ ഭര്‍ത്താവാണ് ബോബി. ടൊറോന്റോയിലെ സെന്റ് തോമസ് സീറോമലബാര്‍ കാത്തലിക് പള്ളിയിലെ ട്രഷറാര്‍, സെക്രട്ടറി എന്നീ നിലകളില്‍ പ്രവര്‍ത്തിച്ചിട്ടുള്ള ബോബി , വിവിധ മലയാളീ അസോസിയേഷനുകളില്‍ പല നിലകളില്‍ പ്രവര്‍ത്തിച്ചിട്ടുണ്ട് .

വിവിധ അസോസിയേഷനുകളെ തമ്മില്‍ കൂട്ടി യോജിപ്പിക്കുന്നതില്‍ അദ്ദേഹം വളരെയധികം ശ്രമിച്ചിരുന്നു. ലാനാ , ഫൊക്കാന, ഫോമാ തുടങ്ങിയ സംഘടനകളിലെ മലയാള സാഹിത്യ സംബന്ധമായ പ്രവര്‍ത്തനങ്ങളില്‍ അദ്ദേഹം സജീവമായിരുന്നു. സര്‍ഗധാരാ വിഷന്‍, മലയാള മയൂരം, ഡാന്‍സിംഗ് ഡാംസല്‍സ് തുടങ്ങിയ വിവിധ പ്രസ്ഥാനങ്ങളില്‍ ഉപദേശക സമതിയംഗമായിരുന്നു. അദ്ദേഹത്തിന്റെ നിര്യാണത്തില്‍ കാനഡയിലുള്ള വിവിധ സംഘടനകള്‍ അനുശോചനം രേഖപ്പെടുത്തി