ന്യൂയോര്‍ക്ക്: ഇന്ത്യന്‍ അമേരിക്കന്‍ മലയാളി കമ്യൂണിറ്റി ഓഫ് യോങ്കേഴ്‌സും ജസ്റ്റിസ് ഫോര്‍ ഓള്‍ (ജെ.എഫ്.എ) പ്രസ്ഥാനവും സംയുക്തമായി ജനുവരി 17ന് സംഘടിപ്പിച്ച ക്രിസ്മസ് പുതുവത്സരാഘോഷ പരിപാടികള്‍ പ്രൗഡഗംഭീരമായി. ഇതോടനുബന്ധിച്ച് 2014 നവംബര്‍ 29ന് യോങ്കേഴ്‌സില്‍ വെച്ച് നടത്തിയ കുട്ടികള്‍ക്കു വേണ്ടിയുള്ള പ്രസംഗ മത്സരത്തിലെ വിജയികള്‍ക്കും മത്സരത്തില്‍ പങ്കെടുത്തവര്‍ക്കും ന്യൂയോര്‍ക്ക് സ്‌റ്റേറ്റിന്റേയും യോങ്കേഴ്‌സ് സിറ്റിയുടേയും മെരിറ്റ് സര്‍ട്ടിഫിക്കറ്റുകള്‍ അമേരിക്കയിലെ മുന്‍നിര രാഷ്ട്രീയ നേതാക്കള്‍ വിതരണം ചെയ്തു.
ജെ.എഫ്.എ സ്ഥാപകനും ചെയര്‍മാനുമായ തോമസ് ജെ കൂവള്ളൂരിന്റെ അധ്യക്ഷതയില്‍ ചേര്‍ന്ന പൊതുയോഗത്തില്‍ ന്യൂയോര്‍ക്ക് സ്‌റ്റേറ്റ് സെനറ്റര്‍മാരായ ജോര്‍ജ് ലാറ്റിമര്‍, ആന്‍ഡ്രിയ സ്റ്റുവര്‍ട്ട് കസിന്‍സ്, കോണ്‍ഗ്രസ്സ് മാന്‍ എലിയട്ട് എന്‍ഗല്‍, അസംബ്ലിവുമണ്‍ ഷെല്ലി മേയര്‍, യോങ്കേഴ്‌സ് സിറ്റി മൈനോറിറ്റി ലീഡര്‍ മൈക്കിള്‍ സബറ്റിനോ, യോങ്കേഴ്‌സ് മേയര്‍ മൈക്ക് സ്പാനോയുടെ പ്രതിനിധിയും ജേര്‍ണലിസ്റ്റുമായ ആലി മുടാനോ, കോണ്‍ഗ്രസ്സ് മാന്‍ എലിയട്ട് എന്‍ഗലിന്റെ സ്റ്റാഫ് അസിസ്റ്റന്റ് ജേ വെഗിമോട്ട് എന്നീ വിശിഷ്ട വ്യക്തികള്‍ പങ്കെടുത്തു.
"പ്രശ്‌നങ്ങളുണ്ടാകുമ്പോള്‍ തന്റേടപൂര്‍വ്വം അത് സമൂഹമദ്ധ്യത്തിലും, അധികാരികളുടെ മുമ്പിലും ഉയര്‍ത്തിക്കാണിക്കാന്‍ നമുക്കു കഴിയണം. അതിന് വാക്ചാതുര്യവും, ചുറുചുറുക്കും തന്റേടവുമുള്ളവര്‍ക്കു മാത്രമേ സാധിക്കുകയുള്ളൂ. കുട്ടികളില്‍ അത്തരത്തിലുള്ള കഴിവുകളെ പ്രോത്സാഹിപ്പിക്കുന്നതിനും പരിപോഷിപ്പിക്കുന്നതിനും വേണ്ടിയാണ് ജെ.എഫ്.എ കുട്ടികളുടെ പ്രസംഗമത്സരം സംഘടിപ്പിച്ചത്. നവംബര്‍ 29ന് നടത്തിയ 7 മുതല്‍ 17 വയസു വരെയുള്ള കുട്ടികളുടെ പ്രസംഗ മത്സരത്തില്‍ 30 കുട്ടികള്‍ പങ്കെടുത്തിരുന്നു. അതില്‍ വിജയിച്ചവര്‍ക്കും പങ്കെടുത്തവര്‍ക്കും ന്യൂയോര്‍ക്ക് സ്‌റ്റേറ്റിന്റേയും യോങ്കേഴ്‌സ് സിറ്റിയുടേയും മെരിറ്റ് സര്‍ട്ടിഫിക്കറ്റുകള്‍ ന്യൂയോര്‍ക്ക് ഗവണ്‍മെന്റിന്റെ പ്രധാന ഭരണകര്‍ത്താക്കള്‍ വിതരണം ചെയ്തതില്‍ സന്തോഷവും അഭിമാനവുമുണ്ട്," തോമസ് കൂവള്ളൂര്‍ പറഞ്ഞു.
സെന്‍ട്രല്‍ പാര്‍ക്ക് അവന്യൂവിലുള്ള യോങ്കേഴ്‌സ് പബ്ലിക് ലൈബ്രറി ഓഡിറ്റോറിയത്തില്‍ ഉച്ചയ്ക്ക് ഒരു മണിയോടെ തുടങ്ങിയ സ്‌നേഹവിരുന്നിനു ശേഷം ചടങ്ങാരംഭിച്ചു. കവിയും, ഗാനരചയിതാവും ഗായകനുമായ അജിത് നായരായിരുന്നു എം സി. അദ്ധേഹത്തിന്റെ പ്രാര്‍ത്ഥനഗാനത്തോടെ പരിപാടികള്‍ക്ക് തുടക്കമായി. ഇന്ത്യന്‍ അമേരിക്കന്‍ ! മലയാളി കമ്യൂണിറ്റി ഓഫ് യോങ്കേഴ്‌സ് വൈസ് പ്രസിഡന്റ് ഷെവെലിയാര്‍ ഇട്ടന്‍ ജോര്‍ജ് പടിയേടത്ത് സ്വാഗതമാശംശിച്ചു. ഗ്രെഗറി പോളിന്റെ ദേശീയ ഗാനലാപനത്തിനു ശേഷം വിശിഷ്ടാതിഥികളും ജെ.എഫ്.എ ഭാരവാഹികളും ചേര്‍ന്ന് ദീപം തെളിയിച്ച് ചടങ്ങ് ഔപചാരികമായി ഉത്ഘാടനം ചെയ്തു. ജെ.എഫ്.എ നാഷണല്‍ ട്രെഷറര്‍ അനില്‍ പുത്തന്‍ചിറ ക്രിസ്മസ് പുതുവത്സരാശംസകള്‍ നേര്‍ന്നു. ഷാജി തോമസ്, ക്രിസ്റ്റി കാടാപ്പുറം എന്നിവര്‍ വിശിഷ്ടാതിഥികളെ സദസ്സിനു പരിചയപ്പെടുത്തി.
ന്യൂയോര്‍ക്ക് സ്‌റ്റേറ്റ് അസംബ്ലിയും യോങ്കേഴ്‌സ് മേയറും ജെ.എഫ്.എയുടെ പ്രവര്‍ത്തനങ്ങളെ അംഗീകരിച്ചുകൊണ്ടുള്ള പ്രൊക്ലമേഷന് ചടങ്ങില്‍ വെച്ച് സംഘടനയുടെ ചെയര്‍മാന്‍ തോമസ് കൂവള്ളൂരിന് നല്‍കി അനുമോദിച്ചു.
യുവതലമുറ അമേരിക്കയുടെ രാഷ്ട്രീയമേഖലയിലേക്ക് കടന്നു വന്ന് രാജ്യത്തിന് വിലയേറിയ സംഭാവനകള്‍ നല്കണമെന്ന് അസംബ്ലിവുമണ്‍ ഷെല്ലി മേയര്‍ ആശംസ പ്രസംഗത്തില്‍ പറഞ്ഞു. ന്യൂയോര്‍ക്ക് സ്‌റ്റേറ്റ് സെനറ്റര്‍ ആന്‍ഡ്രിയ സ്റ്റുവര്‍ട്ട് കസിന്‍സ് ജെ.എഫ്.എയുടെ നിസ്വാര്‍ത്ഥ സേവനങ്ങളെ അഭിനന്ദിച്ചു. ഇന്ത്യയും അമേരിക്കയും ഊഷ്മളമായ ബന്ധം നിലനിര്‍ത്തണമെന്നും, യോജിച്ചു പ്രവര്‍ത്തിക്കണമെന്നും കോണ്‍ഗ്രസ്മാന്‍ എലിയട്ട് എന്‍ഗല്‍ ആവശ്യപ്പെട്ടു. ന്യൂയോര്‍ക്ക് സ്‌റ്റേറ്റ് സെനറ്ററായ ജോര്‍ജ് ലാറ്റിമറും സംഘടനയുടെ പ്രവര്‍ത്തനങ്ങളെ ശ്ലാഘിക്കുകയുണ്ടായി.
മഹാത്മ ഗാന്ധിയുടെയും മാര്‍ട്ടിന്‍ ലൂതര്‍കിംഗ് ജൂനിയറിന്റെയും മഹത്തായ സിദ്ധാന്തങ്ങളില്‍ ഉറച്ചുനിന്ന് കൊണ്ട് ജെ.എഫ്.എ എന്ന പ്രസ്ഥാനം ജാതി മത വര്‍ണ്ണ വ്യത്യാസങ്ങള്‍ക്കതീതമായി അമേരിക്കയില്‍ അനീതി നേരിടുന്ന വ്യക്തികള്‍ക്ക് വേണ്ടി രാജ്യവ്യാപകമായി പോരാടുമെന്ന് ചെയര്‍മാന്‍ തോമസ് കൂവള്ളൂര്‍ തന്റെ പ്രസംഗത്തില്‍ ഊന്നി പറഞ്ഞു.
പ്രസംഗ മത്സരത്തില്‍ ഒന്നാം സ്ഥാനം നേടിയ ആദിഷ് വെല്‍മണി, ടെസിയ തോമസ്, ക്രിസ്റ്റി കാടാപ്പുറം, ജൊയെല്‍ അലക്‌സാണ്ടര്‍, രണ്ടാം സ്ഥാനം നേടിയ ആകാശ് വര്‍ഗീസ് , നിഖിത ജോസഫ് , അരിന്‍ രവീന്ദ്രന്‍, ആല്‍വിന്‍ ജോണ്‍, മൂന്നാം സ്ഥാനം നേടിയ ആഷ്‌ലി അലക്‌സാണ്ടര്‍, മാര്‍കസ് സക്കറിയ, ഷെറില്‍ ഫ്രാന്‍സിസ് , എമിലി ജോണ്‍ എന്നിവര്‍ക്കും മത്സരത്തില്‍ പങ്കെടുത്ത മറ്റു കുട്ടികള്‍ക്കും ന്യൂയോര്‍ക്ക് സ്‌റ്റേറ്റിന്റേയും യോങ്കേഴ്‌സ് സിറ്റിയുടേയും മെരിറ്റ് സര്‍ട്ടിഫിക്കറ്റുകള്‍ വിശിഷ്ടാതിഥികള്‍ വിതരണം ചെയ്തു.
ചടങ്ങില്‍ പങ്കെടുത്ത കുട്ടികള്‍, തോക്കുകള്‍ കൊണ്ടുള്ള ആക്രമണങ്ങള്‍ അവ നിയന്ത്രിക്കേണ്ടതിന്റെ ആവശ്യകത, യുവതലമുറയിലെ വര്‍ദ്ധിച്ചു വരുന്ന മയക്കുമരുന്ന് ഉപയോഗത്തിന്റെ ദൂഷ്യഫലങ്ങള്‍, വിദ്യാലയങ്ങളില്‍ നടന്നു വരുന്ന ബുള്ളിയിംഗ് പ്രശ്‌നവും പരിഹാര മാര്‍ഗങ്ങളും തുടങ്ങിയ വിഷയങ്ങളെക്കുറിച്ച് സംസാരിച്ചു.
മയൂര ഡാന്‍സ് ഗ്രൂപ്പ് അംഗങ്ങളായ ഗായത്രി അജിത് നായര്‍, പ്രസീത ഉണ്ണി, പ്രിയങ്ക ഉണ്ണി, നാട്യ മുദ്ര ഡാന്‍സ് സ്കൂളിലെ ജെസീക്ക ആടുകുഴിയില്‍, ദിവ്യ ആടുകുഴിയില്‍ എന്നിവര്‍ നൃത്തങ്ങള്‍ അവതരിപ്പിച്ചു.
ഫൊക്കാന നാഷണല്‍ ട്രെഷറര്‍ ജോയ് ഇട്ടന്‍, വെസ്‌റ്‌ചെസ്റ്റര്‍ മലയാളി അസ്സോസിയേഷന്‍ പ്രസിഡന്റ് ശ്രീകുമാര്‍ ഉണ്ണിത്താന്‍, സെക്രട്ടറി ടെറന്‍സണ്‍ തോമസ് മാര്‍ക്ക് പ്രസിഡന്റ് ഗോപിനാഥകുറുപ്പ്, കൈരളി ടി വി യു എസ് എ ഡയറക്ടര്‍ ജോസ് കാടാപ്പുറം, മാധ്യമ പ്രവര്‍ത്തക വിനീത നായര്‍, സ്‌പോണ്‍സര്‍ വിനു സക്കറിയ തുടങ്ങിയവര്‍ പരിപാടികളില്‍ പങ്കെടുത്തു. ജെ.എഫ്.എ ഡയറക്ടര്‍ എം. കെ. മാത്യൂസ് ഏവര്‍ക്കും നന്ദി പറഞ്ഞു.
ജെ.എഫ്.എ എന്ന പ്രസ്ഥാനത്തെക്കുറിച്ചുള്ള കൂടുതല്‍ വിവരങ്ങള്‍ക്ക്: തോമസ് കൂവള്ളൂര്‍ : (914 409 5772), tjkoovalloor@live.com, അനില്‍ പുത്തന്‍ചിറ : (732 319 6001), anil@puthenchira.com
Comments