ന്യു യോര്‍ക്ക്: കോവിഡ് -19 മൂലം ഇന്ത്യന്‍-അമേരിക്കന്‍ പത്രപ്രവര്‍ത്തകന്‍ ബ്രഹം കാഞ്ചിബോട്ട്‌ല അന്തരിച്ചു.

 

തിങ്കളാഴ്ച രാവിലെയായിരുന്നു മരണമെന്ന് മകന്‍ സുദാമ കാഞ്ചിബോട്ല പറഞ്ഞു.

 

 

യുണൈറ്റഡ് ന്യൂസ് ഓഫ് ഇന്ത്യയുടെ ലേഖകനായിരുന്നു 66 കാരനായ ബ്രഹം. യുഎസിലെ 28 വര്‍ഷത്തെ മാധ്യമ പ്രവര്‍ത്തനത്തില്‍ ന്യൂസ് ഇന്ത്യ-ടൈംസ് പത്രാധിപ സമിതി അംഗമായാണു തുടക്കമിട്ടത്. പിന്നീട് മെര്‍ജര്‍ മാര്‍ക്കറ്റ്‌സ് എന്ന സാമ്പത്തിക പ്രസിദ്ധീകരണത്തിന്റെ കണ്ടന്റ് എഡിറ്ററായി 11 വര്‍ഷം പ്രവര്‍ത്തിച്ചിട്ടുണ്ട്.

 

ഇന്ത്യയില്‍ വിവിധ പ്രസിദ്ധീകരണങ്ങളില്‍ പ്രവര്‍ത്തിച്ചതിന് ശേഷം 1992-ല്‍ യു.എസില്‍ എത്തി

 

ന്യൂയോര്‍ക്കിലെ നിയന്ത്രണങ്ങള്‍ കാരണം അന്ത്യകര്‍മങ്ങളെക്കുറിച്ച് തീരുമാനിച്ചിട്ടില്ലെന്ന് സുദാമ പറഞ്ഞു.

 

മാര്‍ച്ച് 23 ന് ബ്രഹം കോവിഡ് -19 ലക്ഷണങ്ങള്‍ കാണിച്ചു. നില വഷളായപ്പോള്‍ മാര്‍ച്ച് 28 ന് ലോംഗ് ഐലന്‍ഡിലെ ആശുപത്രിയില്‍ പ്രവേശിപ്പിക്കുകയും ഓക്‌സിജന്‍ മാസ്‌ക് നല്‍കുകയും ചെയ്തുവെന്ന് സുദാമ പറഞ്ഞു.

 

മാര്‍ച്ച് 31 ന് വെന്റിലേറ്ററില്‍ ഇട്ടു, തിങ്കളാഴ്ച അദ്ദേഹത്തിന് ഹൃദയ സ്തംഭനം ഉണ്ടായി

 

ഭാര്യ അഞ്ജന. മകള്‍ സിയുജാന.