തിരുവനന്തപുരത്തെ ശ്രീ പത്മനാഭ സ്വാമി ക്ഷേത്ര മാതൃകയില്‍ ഒഡിഷയിലെ പുരി ജഗന്നാഥ ക്ഷേത്രത്തില്‍ സ്വര്‍ണാഭരണങ്ങളുടെ കണക്കെടുപ്പിന് അരങ്ങൊരുങ്ങുന്നു. ഒരു വിഭാഗം ഭക്തരുടെ കടുത്ത എതിര്‍പ്പ് മറികടന്നാണ് ക്ഷേത്രം മാനേജിങ് കമ്മിറ്റി ഇതിന് തീരുമാനമെടുത്തത്. സ്വര്‍ണ, രത്ന, വൈഡൂര്യങ്ങളുടെ കണക്കെടുപ്പിന് ഉപസമിതി ഉണ്ടാക്കിയ മാനേജിങ് കമ്മിറ്റി സംസ്ഥാന സര്‍ക്കാറിന്‍െറ സഹകരണത്തോടെയാണ് ആഭരണങ്ങള്‍ എണ്ണിതിട്ടപ്പെടുത്താന്‍ പോകുന്നത്.
പുരാതനമായ പുരി ജഗന്നാഥ ക്ഷേത്രത്തില്‍ ഏഴു നിലവറകളിലായാണ് അമൂല്യ ആഭരണങ്ങള്‍ സൂക്ഷിച്ചിരിക്കുന്നത്. ഇതില്‍ രണ്ടു നിലവറകള്‍ മാത്രമെ ഇതിനകം തുറന്നിട്ടുള്ളു. ഒന്നാമത്തെ നിലവറയില്‍ 150ഉം രണ്ടാം നിലവറയില്‍ 180ഉം ആഭരണങ്ങള്‍ നേരത്തെ എണ്ണിതിട്ടപ്പെടുത്തിയിട്ടുണ്ട്. മറ്റു അഞ്ചുനിലവറകള്‍ ഇതുവരെ തുറന്നിട്ടില്ല. കോടികള്‍ വിലമതികുന്ന രത്നാഭരണങ്ങളും വെള്ളിയാഭരണങ്ങളും അതില്‍ ഉണ്ടെന്നാണ് അനുമാനം. കണക്കെടുപ്പ് പൂര്‍ത്തിയാക്കി ആഭരണങ്ങള്‍ ഇന്‍ഷുര്‍ ചെയ്യാനാണ് ക്ഷേത്രകമ്മിറ്റി തീരുമാനം.
പത്മനാഭ സ്വാമി ക്ഷേത്രത്തിലെന്ന പോലെ നിലവറകള്‍ തുറക്കരുതെന്ന വാദഗതികള്‍ പുരിയിലുമുണ്ട്. എന്നാല്‍, ക്ഷേത്രകമ്മിറ്റി ഇവ തുറന്ന് സ്വത്തുതിട്ടപ്പെടുത്തി ഇന്‍ഷുര്‍ ചെയ്യണമെന്ന അഭിപ്രായക്കാരാണ്.
Comments