ഹരിപ്പാട്  ഹൈടെക്ക് ബസ്സ് കാറിലിടിച്ച് ഭാര്യയും ഭര്‍ത്താവും മരുമകളും ഉള്‍പ്പെടെ ഒരു കുടുംബത്തിലെ നാലുപേരും കാര്‍ ഡ്രൈവറും മരിച്ചു. മരിച്ച യുവതിയുടെ മടിയിലിരുന്ന മൂന്ന് വയസ്സുള്ള കുഞ്ഞ് പുറത്തേക്കു തെറിച്ചുവീണെങ്കിലും രക്ഷപ്പെട്ടു. ദേശീയപാതയില്‍ നങ്ങ്യാര്‍കുളങ്ങരയ്ക്ക് തെക്ക് പോലീസ് സ്റ്റേഷന്‍ ജങ്ഷനില്‍ വ്യാഴാഴ്ച ഉച്ചയ്ക്ക് പന്ത്രണ്ടരയ്ക്കാണ് അപകടം.
കരുനാഗപ്പള്ളി കഌപ്പന വരവിള സി.പി.ബംഗഌവില്‍ മുഹമ്മദ്കുഞ്ഞ് (75), ഭാര്യ നബീസാകുഞ്ഞ് (60), മരുമകള്‍ ഫെമിന (30), മുഹമ്മദ്കുഞ്ഞിന്റെ സഹോദരി വരവിള ഹിദായത്ത് മന്‍സിലില്‍ മറിയുമ്മ (70), കാര്‍ ഡ്രൈവറും അയല്‍വാസിയുമായ വരവിള പടയണത്ത് കോയക്കുട്ടിയുടെ മകന്‍ അബ്ദുള്‍ ലത്തീഫ് (45) എന്നിവരാണ് മരിച്ചത്. ഫെമിനയുടെ മകള്‍ നൈജ (മൂന്ന്)യ്ക്ക് തലയ്ക്കാണ് പരിക്ക്. കുഞ്ഞിനെ വിദഗ്ദ ചികിത്സയ്ക്കായി തിരുവനന്തപുരത്ത് സ്വകാര്യ ആസ്പത്രിയില്‍ പ്രവേശിപ്പിച്ചു.