മലയാളത്തിന്റെ എക്കാലത്തെയും ജനപ്രിയ നടനാണ് ദിലീപ്. ഒക്ടോബര്‍ 27 ജനപ്രിയ നായകന്റെ പിറന്നാള്‍ ദിവസമാണ്. ദിലീപിന്റെ പിറന്നാള്‍ കഴിഞ്ഞ ദിവസം തന്നെ ആരാധകര്‍ ആഘോഷമാക്കി മാറ്റിയിരുന്നു. നിരവധി ഹിറ്റുചിത്രങ്ങള്‍ പ്രേക്ഷകര്‍ക്കു സമ്മാനിച്ച ദിലീപ് ഇന്ന് തന്റെ അന്‍പതാം പിറന്നാളിന്റെ നിറവിലാണ്.

ഇത്തവണത്തെ പിറന്നാള്‍ ദിലീപിനും കുടുംബത്തിനും ഇരട്ടി മധുരമാണ് സമ്മാനിച്ചിരിക്കുന്നത്. വിജയദശമി ദിനത്തില്‍ മീനാക്ഷിക്ക് ഒരു കുഞ്ഞനുജത്തി ഉണ്ടായതിന്റെ സന്തോഷത്തിലാണ് ദിലീപിന്റെയും കാവ്യയുടേയും കുടുംബം. എന്നാല്‍ തന്റെ പിറന്നാള്‍ ദിനത്തില്‍ ആരാധകര്‍ക്ക് മറ്റൊരു സര്‍പ്രൈസ് ഒരുക്കി ഞെട്ടിച്ചിരിക്കയാണ് താരം. ജീവിത്തതിലെ പ്രതിസന്ധികള്‍കളില്‍ തളരാതെ നിന്ന നടന് ആരാധകരുടെ ആശംസാ പ്രവാഹമാണ്.

ദിലീപിന്റെ പിറന്നാള്‍ ദിനം പുതിയ ചിത്രങ്ങളുടെ വിശേഷങ്ങള്‍ അണിയറ പ്രവര്‍ത്തകര്‍ പുറത്തുവിടുമെന്ന് നേരത്തെ റിപ്പോര്‍ട്ടുകള്‍ വന്നിരുന്നു. ഇപ്പോഴിതാ ആരാധകരെ ഒന്നടങ്കം ആവേശത്തിലാഴ്ത്തി ജനപ്രിയ നായകന്റെ പിറന്നാള്‍ സമ്മാനം എത്തിയിരിക്കുകയാണ്. ബി ഉണ്ണികൃഷ്ണന്‍ ചിത്രത്തിന്റെ പോസ്റ്റര്‍ പങ്കുവെച്ചുകൊണ്ടാണ് ദിലീപ് എത്തിയിരിക്കുന്നത്.

കമ്മാര സംഭവത്തിനു ശേഷം ബി ഉണ്ണികൃഷ്ണന്‍ സംവിധാനം ചെയ്യുന്ന സിനിമയിലാണ് ദിലീപ് അഭിനയിച്ചുകൊണ്ടിരിക്കുന്നത്. ബി ഉണ്ണികൃഷ്ണന്‍ തന്നെ രചനയും സംവിധാനവും നിര്‍വ്വഹിക്കുന്ന ചിത്രത്തില്‍ വിക്കന്‍ വക്കീലായിട്ടാണ് ദിലീപ് എത്തുന്നതെന്നാണ് വിവരം. ദിലീപ് ആദ്യമായിട്ടാണ് ഒരു മുഴുനീള വക്കീല്‍ വേഷത്തില്‍ എത്തുന്നത്. ജനപ്രിയ നായകന്റെ സിനിമകളില്‍ നിന്നും പ്രതീക്ഷിക്കുന്ന എല്ലാ ഘടകങ്ങളും ഈ ചിത്രത്തിലും ഉണ്ടാവുമെന്നാണ് അറിയുന്നത്. ഒറ്റ ഷെഡ്യൂളിലാണ് അണിയറ പ്രവര്‍ത്തകര്‍ സിനിമ ചിത്രീകരിക്കുന്നത്.