തോമസ് കൂവള്ളൂര്‍
ന്യൂയോര്‍ക്ക് : കഴിഞ്ഞ ഏതാനും മാസങ്ങളായി ജെസ്റ്റീസ് ഫോര്‍ ഓള്‍(ജെ.എഫ്.എ.) എന്ന സംഘടനയുടെ നേതൃത്വത്തില്‍ ഫ്‌ളോറിഡായിലെ പനാമ സിറ്റിയില്‍ നിന്നും കാണാതായ റെനി ജോസിനെ ഏതെങ്കിലും വിധേന കണ്ടുപിടിക്കുന്നതിനുവേണ്ടിയുള്ള ശ്രമങ്ങള്‍ നടന്നു വരുകയായിരുന്നു. അതിന്റെ ഭാഗമായി 20, 000 ല്‍ പരം ഒപ്പുകള്‍ ശേഖരിച്ച് യു.എസ്.സെനറ്റര്‍മാര്‍ക്കും, യു.എസ്. അറ്റോര്‍ണി ജനറല്‍ മുതലായവര്‍ക്കെല്ലാം ഇമെയിലുകളിലൂടെയും, നേരിട്ടും, രജസിറ്റര്‍ ചെയ്തും നിരവധി പരാതികള്‍ അയയ്ക്കുകയുണ്ടായി.
പക്ഷേ ഒരിടത്തുനിന്നും കാര്യമായ മറുപടികളൊന്നും ലഭിച്ചില്ല. ഫ്‌ളോറിഡാ, ടെക്‌സാസ്, ന്യൂയോര്‍ക്ക്, എന്നീ സ്‌റ്റേറ്റുകളുമായി ബന്ധപ്പെട്ട കേസ് ആയതിനാല്‍ ഫ്‌ളോറിഡായിലെ ബേ കൗണ്ടി ഷെറീഫിന് അദ്ദേഹത്തിന്റെ അധികാര പരിധിയില്‍ നിന്നുകൊണ്ട് ഒന്നും തന്നെ ചെയ്യാന്‍ സാധിക്കുകയില്ല എന്ന് റെനിയുടെ മാതാപിതാക്കള്‍ക്കും, അതുമായി ബന്ധപ്പെട്ടവര്‍ക്കെല്ലാം വ്യക്തമായിരുന്നു. ഇതിനിടെ പനാമാ സിറ്റിയോടടുത്ത പ്രദേശത്ത് തങ്ങളുടെ മകന്‍ ജീവനോടെ ഇരിക്കുന്നു എന്നതിന്റെ സൂചനകള്‍ റെനിയുടെ മാതാപിതാക്കള്‍ക്ക് ലഭിച്ചിരുന്നു. ഈ സാഹചരിയത്തില്‍ പനാമാ സിറ്റിയില്‍ നേരിട്ടുപോയി സത്യാവസ്ഥകള്‍ മനസ്സിലാക്കുന്നതിനും റെനിയെ കാണാതായതിന്റെ ഒന്നാം വാര്‍ഷികത്തിന്റെ അനുസ്മരണം നടത്തുന്നതിനും ജസ്റ്റീസ് ഫോര്‍ ഓള്‍ ന്യൂസ് റിപ്പോര്‍ട്ടിലൂടെ അറിയിച്ചിരുന്നു. കൂടാതെ ജെ.എഫ്.എ. ചെയര്‍മാന്‍ തോമസ് കൂവള്ളൂരും, ജെ.എഫ്.എ.യുടെ അനുഭാവിയായ ഫ്‌ളോറിഡായിലെ ഓറഞ്ച് സിറ്റിയിലെ കൗണ്‍സില്‍ മെമ്പറും കൂടി ആയ ടോം എബ്രഹാമും റെനിയുടെ മാതാപിതാക്കളോടൊപ്പം ബേ കൗണ്ടി ഷെറീഫിന്റെ ഓഫീസില്‍ നേരിട്ടും പോയി അന്വേഷണം ത്വരിതപ്പെടുത്തുന്നതിന് നേരത്തെ പ്ലാന്‍ ചെയ്തിരുന്നു.
മാര്‍ച്ച് 13 ന് വെള്ളിയാഴ്ച ഉച്ചകഴിഞ്ഞ് റെനിയുടെ മാതാപിതാക്കളോടൊപ്പം തോമസ് കൂവള്ളൂര്‍, ടോം എബ്രഹാം എന്നിവര്‍ ബേ കൗണ്ടി ഷെറീഫിന്റെ ഓഫീസില്‍ നേരിട്ടുചെല്ലുകയും അപ്പോള്‍ ഡ്യൂട്ടിയിലുണ്ടായിരുന്ന ക്രിമിനല്‍ ഇന്‍വെസ്റ്റിഗേഷന്‍ ഡിവിഷന്റെ വിക്ടിംസ് അഡ്വക്കേറ്റ് ഓഫീസര്‍ ഷെവീനാ ജാക്‌സനുമായി ഒരു മണിക്കൂറിലേറെ സംസാരിക്കുകയുണ്ടായി.
റെനിജോസിന്റെ കേസ് ഇപ്പോഴും ഓപ്പണ്‍ ആണെന്നും എന്തെങ്കിലും തുമ്പു കിട്ടിയാല്‍ അറിയിക്കുന്നതാണെന്നും അവര്‍ പറയുകയുണ്ടായി. ടോം എബ്രഹത്തിന്റെ ചോദ്യങ്ങള്‍ക്കു മറുപടിയായി ആവശ്യത്തിന് സ്റ്റാഫും, പണവും ഇല്ലാത്തതിനാലാണ് പല കേസുകളും അന്വേഷണം പൂര്‍ത്തിയാക്കാന്‍ താമസം നേരിടുന്നതെന്നും അവര്‍ പറഞ്ഞു. പിതാവ് ജോസ് ജോര്‍ജ് നേരത്തെ വിളിച്ചപ്പോള്‍ മലേഷ്യന്‍ വിമാനം കാണാതെ പോയിട്ട് നിരവധി രാജ്യങ്ങള്‍ ശ്രമിച്ചിട്ടുപോലും ഒരു തുമ്പുണ്ടാക്കാന്‍ കഴിഞ്ഞില്ല, അപ്പോള്‍ റെനിയുടെ കാര്യം പറയേണ്ടതില്ലല്ലോ' എന്ന മുടന്തന്‍ ന്യായമാണ് അവര്‍ പറഞ്ഞതെന്ന് അദ്ദേഹം പറയുകയുണ്ടായി. റെനിയോടൊപ്പമുണ്ടായിരുന്ന മറ്റുള്ളവരെ വേണ്ടവിധത്തില്‍ ചോദ്യം ചെയ്യാനോ പ്രാഥമിക തെളിവുകള്‍ എടുക്കുന്നതിനോ പോലും ബേ കൗണ്ടി ഷെറീഫിന്റെ ഓഫീസ് വീഴ്ചവരുത്തിയിട്ടുണ്ടെന്നുള്ളത് വളരെ വ്യക്തമായി. തങ്ങള്‍ക്ക് അന്വേഷണം നടത്താന്‍ കഴിവില്ലെങ്കില്‍ ആ വിവവരം വേണ്ടപ്പെട്ടവരെ അറിയിച്ച് എഫ്.ബി.ഐ.യെ അന്വേഷണ ചുമതല ഏല്‍പിക്കാന്‍ തോമസ് കൂവള്ളൂര്‍ പറയുകയുണ്ടായി.
മാര്‍ച്ച് 14ന് ശനിയാഴ്ച നടക്കുന്ന റെനി ജോസിനുവേണ്ടിയുള്ള പ്രസ്മീറ്റിലും, ഞായറാഴ്ച 12.30 ന് നടക്കുന്ന 'ഹോങ്ക് ഫോര്‍ റെനി' എന്ന പരിപാടിയിലും അവര്‍ സംബന്ധിക്കാമെന്നേല്‍്കകുകയുണ്ടായി. ശനിയാഴ്ച വൈകീട്ട് ഗാര്‍ഡിയന്‍ ഏഞ്ചല്‍ എന്ന വിഭാഗക്കാരുടെ നേതൃത്വത്തില്‍ നടത്തിയ പ്രസ് മീറ്റിലും റെനി ജോസിനെപ്പറ്റിയുള്ള അനുസ്മരണ യോഗത്തിലും റെനിയുടെ മാതാപിതാക്കള്‍ക്കുപുറമെ ജെ.എഫ്.എ.യുടെ പ്രവര്‍ത്തകരായ ടോം എബ്രഹാം, തോമസ് കൂവള്ളൂര്‍, സോണി കരിപ്പാപ്പറമ്പില്‍, ലീനാ മാത്യൂ, സാറാ മാത്യൂ, സറീനാ മാത്യൂ, സലീനാ മാത്യൂ, സബീനാ മാത്യൂ എന്നിവരും സജീവമായി പങ്കെടുക്കുകയുണ്ടായി.
പിന്നീട് ജെ.എഫ്.എ. പ്രവര്‍ത്തനകര്‍ മാത്രമായി റെനി താമസിച്ചിരുന്ന വീടിന്റെ മുമ്പില്‍ വച്ച് മെഴുകുതിരി കത്തിച്ച് പ്രാര്‍ത്ഥനയും വിജിലും നടത്തുകയുണ്ടായി.ഞായറാഴ്ച 12.30ന് പനാമാ സിറ്റിയുടെ പ്രധാന ഹൈവേകള്‍ സന്ധിക്കുന്ന തോമസ് ഡ്രൈവും റൂട്ട് 98 ഉം ചേരുന്ന ഇന്റര്‍ സെക്ഷനില്‍ ഒരു മണിക്കൂറിലധികം റെനി ജോസിനു വേണ്ടിയുള്ള തെരച്ചില്‍ ഊര്‍ജ്ജിതപ്പെടുത്താന്‍ വാഹനങ്ങളുടെ ഹോണ്‍ അടിപ്പിച്ച് ഐക്യദാര്‍ഢ്യം പ്രഖ്യാപിക്കുന്ന ചടങ്ങ് വളരെ ശ്രദ്ധേയമായിരുന്നു. ബേ കൗണ്ടി ഷെറീഫിന്റെ എല്ലാ സഹകരണവും അക്കാര്യത്തില്‍ ലഭിക്കുകയുണ്ടായി.
സ്‌ക്കൂള്‍ കുട്ടികളായ സാറാമാത്യൂ, സറീനാ മാത്യൂ, സലീനാ മാത്യൂ, സബീനാ മാത്യൂ എന്നിവര്‍ക്ക് ഷെറീഫിന്റെ പ്രത്യേക ബാഡ്ജുകളും, നോട്ടുകളും കൊടുക്കുകയുണ്ടായി. കമ്മ്യൂണിറ്റി സര്‍വ്വീസിന് ഗാര്‍ഡിയന്‍ ഏഞ്ചല്‍സിന്റെ പ്രത്യേക സര്‍ട്ടിഫിക്കറ്റുകളും അവര്‍ക്ക് അയച്ചു കൊടുക്കുന്നതായിരിക്കും എന്ന് അതിന്റെ ഓര്‍ഗനൈസേഴ്‌സ് പറയുകയുണ്ടായി. മേല്‍ പറഞ്ഞ 4 കുട്ടികളും സോണി കരിപ്പാപ്പറമ്പിലിന്റെയും ലീനാ മാത്യൂവിന്റെയും മക്കള്‍ ആണെന്നുള്ള കാര്യം എടുത്തു പറയത്തക്കതാണ്. അവരുടെ ചിത്രങ്ങള്‍ ഫ്‌ളോറിഡായിലെ പല ഇംഗ്ലീ്ഷ് ചാനലുകളിലും അന്നുതന്നെ വരുകയുണ്ടായി. പനാമാ സിറ്റി ബീച്ചില്‍ നിന്നുള്ള പത്രങ്ങളുടെ ഫ്രണ്ട് പേജുകളില്‍ വരെ റെനി ജോസിന്റെ ന്യൂസ് വന്നിരുന്നു എന്നത് വളരെ ആശ്വാസകരമായ ഒന്നാണ്.
ജസ്റ്റീസ് ഫോര്‍ ഓള്‍ എന്ന സംഘടനയെ സംബന്ധിച്ചിടത്തോളം കഴിഞ്ഞ ഒരു വര്‍ഷമായി എല്‍.എസ്.ഡി. കഴിച്ച് കടലില്‍ മുങ്ങിപ്പോയി എന്ന് കരുതിയിരുന്ന റെനിജോസ് ഇപ്പോഴും ജീവിച്ചിരിക്കുന്നു എന്നുള്ളത് ഒരു സന്തോഷകരമായ വാര്‍ത്തയാണ്. ബേ കൗണ്ടി ഷെറീഫിന്റെ പരിമിതികള്‍മൂലം അനങ്ങാതിരിക്കുന്ന അന്വേഷണം ത്വരിതപ്പെടുത്താന്‍ വാസ്തവത്തില്‍ മലയാളി സമൂഹം ഉണര്‍ന്ന് പ്രവര്‍ത്തിക്കേണ്ടത് ഇത്തരത്തിലുള്ള സന്ദര്‍ഭങ്ങളിലാണ്. റെനി ജോസിന്റെ മാതാപിതാക്കളെ സംബന്ധിച്ചിടത്തോളം ആരുടെ ഭാഗത്തുനിന്നും ഇക്കാര്യത്തില്‍ സഹായം ലഭിച്ചാലും അത് വലിയൊരു അനുഗ്രഹമായിരിക്കും. ക്രിസ്ത്യാനികളെല്ലാം പുതിയൊരു ഉയിര്‍പ്പിനു വേണ്ടി നോമ്പുനോക്കുന്ന ഈ അവസരത്തില്‍ കാണാതായ റെനിയെ കണ്ടുകിട്ടുന്നതിനുവേണ്ടി അല്പനേരം മനസ്സുരുകി പ്രാര്‍ത്ഥിച്ചാല്‍ ആ പ്രാര്‍ത്ഥനയ്ക്ക് ഫലം ഉണ്ടാകാതിരിക്കുകയില്ല. കാണാതായ റെനിയെ കണ്ടെത്താന്‍ എഫ്.ബി.ഐ.എ. ഇടപെടുത്താന്‍ കഴിഞ്ഞാല്‍ അവര്‍ക്ക് നിമിഷനേരം കൊണ്ട് സത്യം പുറത്തു കൊണ്ടുവരുന്നതിനും സാധിക്കും. ഇതിനുവേണ്ടി ആല്‍ബനിയിലെ ഫെഡറല്‍ ബില്‍ഡിങ്ങിന്റെ മുമ്പില്‍ ഏപ്രില്‍മാസത്തിന്റെ അവസാനത്തോടെ ഒരു പ്രതിഷേധപ്രകടനം നടത്തുന്ന കാര്യവും ജെ.എഫ്.എ. ആലോചിച്ചുവരുന്നു. ഇക്കാര്യം വിജയിക്കണമെങ്കില്‍ എല്ലാ സാമൂഹ്യ-രാഷ്ട്രീയ- മത സംഘടനകളുടെയും നല്ലവരായ ആള്‍ക്കാരുടെയും സഹായം കൂടിയേ തീരൂ എന്നുള്ള കാര്യത്തില്‍ സംശയമില്ല.
റെനിക്കും, റെനിയുടെ മാതാപിതാക്കള്‍ക്കും, കുടുംബാംഗങ്ങള്‍ക്കും എത്രയും വേഗം നീതി ലഭിക്കട്ടെ എന്ന പ്രാര്‍ത്ഥനയോടെ.
http://www.wjhg.com/home/headlines/Honk-for-Reny-Aims-to-Keep-Reny-Joses-Disappearance-in-the-Public-Eye-296381911
http://www.wjhg.com/home/headlines/Honk-for-Reny-Aims-to-Keep-Reny-Joses-Disappearance-in-the-Public-Eye-296381911
http://www.newsherald.com/news/crime-public-safety/guardian-angels-join-family-in-remembering-reny-1.451301
Comments