ബംഗളൂരു: തമിഴനാട് മുന് മുഖ്യമന്ത്രിയും അണ്ണാ ഡിഎംകെ നേതാവുമായ ജെ.ജയലളിത ജാമ്യം നേടി ജയില് മോചിതയായി. മൂന്നു മണിക്കു ശേഷമാണ് അനധികൃത സ്വത്ത് സമ്പാദനക്കേസില് ശിക്ഷിക്കപ്പെട്ട ജയലളിത പരപ്പന അഗ്രഹാര ജയിലില് നിന്നും പുറത്തേക്കു വന്നത്. 22 ദിവസത്തെ ജയില് വാസത്തിനു ശേഷം പുറത്തിറങ്ങിയ ജയലളിതയെ സ്വീകരിക്കാന് തമിഴ്നാട്ടില് വന് ഒരുക്കങ്ങളാണ് നടത്തിയിരിക്കുന്നത്. പാര്ട്ടി പ്രവര്ത്തകര് രാവിലെ മുതല് തെരുവിലാണ്. ജയാരവം മുഴക്കിയാണ് അമ്മയെ സ്വീകരിക്കാന് അണികള് കാത്തിരിക്കുന്നത്. അതേസമയം, ആഹ്ലാദ പ്രകടനം അതിരുകടക്കരുതെന്നും കോടതിയെ വിമര്ശിക്കുന്ന നടപടി ഉണ്ടാവരുതെന്നും പാര്ട്ടി നേതൃത്വം അണികള്ക്ക് നിര്ദേശം നല്കി. ജയിലില് നിന്നു പുറത്തുവന്ന ജയലളിതയെ നൂറുകണക്കിന് വാഹനങ്ങളുടെ അകമ്പടിയോടെ തമിഴ്നാട് സര്ക്കാരും എഐഎഡിഎംകെ പ്രവര്ത്തകരും ചേര്ന്ന് വിമാനത്താവളത്തിലേക്ക് സ്വീകരിച്ച് ആനയിച്ചത്. ജയലളിതയ്ക്കൊപ്പം ജയില് മോചിതയായ കൂട്ടുപ്രതി ശശികലയും വാഹനത്തിലുണ്ട്.
Comments