നാസയുടെ കാര്‍ഗോ ബഹിരാകാശ പേടകം വിക്ഷേപിച്ച് സെക്കന്റുകള്‍ക്കകം തകര്‍ന്നു. പേടകവും വഹിച്ച് പറന്നുപൊന്തിയ ഓര്‍ബിറ്റല്‍ സയന്‍സസ് കോര്‍പ്പറേഷന്റെ ആന്റാരസ് റോക്കറ്റ് ആറു സെക്കന്റുകള്‍ക്ക് ശേഷം പൊട്ടിത്തെറിച്ചു. ഇന്റര്‍നാഷണല്‍ സ്‌പെയ്‌സ് സ്റ്റേഷനിലേക്കുള്ള ആഹാരം ഉള്‍പ്പടെയുള്ള അവശ്യസാധനങ്ങളും വഹിച്ചുള്ള പേടകമാണ് തകര്‍ന്നത്. ഈ വര്‍ഷം രണ്ടുതവണ കാര്‍ഗോയുമായുള്ള പേടകം സ്‌പെയ്‌സ് സ്റ്റേഷനിലെത്തിയിരുന്നു. ആഹാരവും വിവിധ ശാസ്‌ത്രോപകരണങ്ങളും പണിയായുധങ്ങളും ഓര്‍ബിറ്റിങ് ലാബോറട്ടറിയില്‍ എത്തിക്കാനായിരുന്നു മൂന്നാമത്തെയും ശ്രമം.ബുധനാഴ്ച സമാനമായ പേടകം റഷ്യ വിക്ഷേപിക്കുന്നുണ്ട്. ഇന്റര്‍നാഷണല്‍ സ്‌പെയ്‌സ് സ്റ്റേഷനിലുള്ള ബഹിരാകാശ ശാസ്ത്രജ്ഞര്‍ തത്ക്കാലം റഷ്യന്‍ കാര്‍ഗോയില്‍ നിന്നുള്ള സഹായം സ്വീകരിക്കുമെന്ന് നാസ അറിയിച്ചു.
Comments