ന്യൂയോര്‍ക്ക് : പണത്തെക്കുറിച്ചുള്ള വാക്കുതര്‍ക്കത്തിനൊടുവില്‍ എഴുപതു വയസ്സുള്ള അമ്മാവന്‍ വില്യം വാലന്റിയെ കഴുത്ത് ഞെരിച്ചു കൊലപ്പെടുത്തിയശേഷം ദമ്പതിമാര്‍ ജോര്‍ജ്ജ് വാഷിംഗ്ടണ്‍ പാലത്തില്‍ നിന്നും ചാടി ആത്മഹത്യ ചെയ്തു.
നിക്ക ഹണ്ടും(40), ബോയ്ഫ്രണ്ട് ഗാരി ക്രോക്കറ്റും(41) അമ്മാവനൊപ്പമാണ് താമസിച്ചിരുന്നത്. അമ്മാവന്റെ ബാങ്ക് എക്കൗണ്ടില്‍ നിന്നും പലവട്ടം അറിയാതെ ദമ്പതിമാര്‍ പണം പിന്‍വലിച്ചിരുന്നു. അമ്മാവന്‍ ഇതിനെക്കുറിച്ചു ഇവരോട് പലവട്ടം തര്‍ക്കിച്ചിരുന്നുവെങ്കിലും പോലീസില്‍ പരാതിപ്പെട്ടിരുന്നില്ല.
ഏപ്രില്‍ 28 തിങ്കളാഴ്ച ഇവരുടെ ഒരു ബന്ധു വീട്ടില്‍ സന്ദര്‍ശനത്തിനെത്തിയപ്പോള്‍ വീടിനകത്തു വില്യം മരിച്ചുകിടക്കുന്നതാണ് കണ്ടത്. പോലീസ് എത്തി പരിശോധിച്ചപ്പോള്‍ ദമ്പതിമാര്‍ ഒരു ആത്മഹത്യകുറിപ്പ് എഴുതിവെച്ചിരിക്കുന്നുന്നതും അമ്മാവന്റെ കാര്‍ മോഷണം പോയിരിക്കുന്നതായും കണ്ടെത്തി.
ദമ്പതിമാരെ അന്വേഷിച്ച് പോലീസ് ജോര്‍ജ്ജ് വാഷിംഗ്ടണ്‍ പാലത്തിനു സമീപം പാര്‍ക്കു ചെയ്തിരിക്കുന്ന കാര്‍ കണ്ടെത്തുകയായിരുന്നു. തിങ്കളാഴ്ച വൈകീട്ട് വെള്ളത്തില്‍നിന്നും കണ്ടെത്തിയ നിക്കി ഹണ്ടിന്റെ ശരീരത്തില്‍ നിന്നും കാറിന്റെ താക്കോല്‍ ലഭിച്ചു. ഗാരിയുടെയും മൃതശരീരം വെള്ളത്തിനടിയില്‍ നിന്നും പോലീസ് കണ്ടെടുത്തു.
>
ദമ്പതിമാരുടെ പേരില്‍ പല ക്രിമിനല്‍ കേസ്സുകളും ഉണ്ടായിരുന്നതായി ന്യൂയോര്‍ക്ക് പോലീസ് പറഞ്ഞു. മരിച്ച ദമ്പതിമാര്‍ക്ക് ഇരട്ടകുട്ടികള്‍ ഉള്‍പ്പെടെ നാലുമക്കള്‍ ഉണ്ടായിരുന്നതായും പോലീസ് വെളിപ്പെടുത്തി.
Comments